Ef foreldri þitt er veikt er eðlilegt að upplifa alls konar tilfinningar og vera með margar spurningar. Það getur hjálpað að tala við einhvern – þó að viðkomandi hafi ekki öll svörin. Stundum hjálpar bara að geta sagt hlutina upphátt og upplifa að á mann sé hlustað.
Hugsaðu um hvort það sé einhver í kringum þig sem þú treystir. Það gæti verið kennari eða námsráðgjafi í skólanum, þjálfari, foreldri vinar, frænka eða frændi, amma eða afi – eða einfaldlega einhver sem þér finnst gott að tala við.
Stundum þarf maður að prófa sig áfram. Ef fyrsta manneskjan sem þú talar við hjálpar þér ekki nóg, þá er það ekki þér að kenna – heldur bara merki um að þú þurfir að finna einhvern annan. Það getur tekið tíma að finna réttu manneskjuna sem skilur þig og hlustar á þig á þann hátt sem þú þarft.
